Anna Catrina è ina figura fictiva dal 16avel tschientaner, che abita e lavura a Glion. Ensemen cun ella mainan ins tras la citad veglia da Glion ed emprenda d'enconuscher la citad da nov.
L'idea è naschida avant diesch onns, cura che Rino Caduff è stà da l'avis che Glion na vegnia betg apprezià avunda. Ensemen cun ina gruppa ha el lura fundà la Anna Catrina SA e fatg scriver in'istorgia da tschintg istorichers. Il cudesch Anna Catrina ha lura servì sco basa per la visita guidada tras la citad veglia.
-
Bild 1 von 4. L'entschatta è avant il museum regiunal Surselva. Bildquelle: RTR.
-
Bild 2 von 4. Romana Brunold maina sco Anna Catrina la visita guidada. Bildquelle: RTR.
-
Bild 3 von 4. Anna Catrina tschertga ovs per la cuschiniera e raquinta a medem temp da l'istorgia da Glion. Bildquelle: RTR.
-
Bild 4 von 4. Romana Brunold mida duas giadas la rolla durant la visita guidada. Bildquelle: RTR.
Quei saja donn che Glion haja uschè ina bella citad veglia che na vegni betg appreziada, di Rino Caduff. Dal cudesch è er naschì in cudesch per uffants en duas linguas.
Er blers indigens san be pauc davart l'istorgia da Glion, e quai è il motiv pertge che nus avain s'occupà cun quest tema.
La via d'Anna Catrina en tschertga dad ovs maina en la baselgia refurmada, enturn il mir da la citad e puspè enavos al museum regiunal Surselva. L'actura Romana Brunold raquinta sco Anna Catrina da las metodas da tortura, dals patruns da quel temp e da las restanzas da differentas chasas e portas.
-
Bild 1 von 5. Anna Catrina en la baselgia refurmada da Glion. Bildquelle: RTR.
-
Bild 2 von 5. La fantschella tschertga anc adina ovs per la cuschiniera. Bildquelle: RTR.
-
Bild 3 von 5. La via maina enturn il mir da la citad. Bildquelle: RTR.
-
Bild 4 von 5. La porta sura. Bildquelle: RTR.
-
Bild 5 von 5. Anna Catrina raquinta dals Bernais e dals Turitgais e ses connex cun Glion. Bildquelle: RTR.
La visita guidada vegn manada dal tuttafatg dad ina persuna – l'actura Romana Brunold. Ella lavura dapi otg onns per la Anna Catrina SA a Glion. Cumenzà haja, cura ch'in auter actura ha chalà e Romana Brunold è vegnida dumandada, sch'ella vul surpigliar la rolla.
Jau fatsch gia blers onns teater ed jau sun lura vegnida dumandada, sche jau less prender part – e quai fatsch jau ussa dapi otg onns.
Durant quests otg onns ha ella emprendì d'enconuscher bleras differentas gruppas. Sia incumbensa n'è betg adina simpla, di Romana Brunold. Tschertas persunas discurran mintgatant simplamain tranteren u l'interrumpan cun dumondas. La difficultad la pli gronda è dentant, da na perder nagin ed esser segira che tuts stattan ensemen. Tuttina giauda ella questa incumbensa.
Jau pens ch'ins taidla gugent – ed ins vesa tut e sa po far in maletg da l'istorgia.
Suenter in'ura arriva la gruppa puspè tar il museum regiunal Surselva. Ils ovs n'ha Anna Catrina betg chattà, ma ella sto turnar a la lavur. Romana Brunold terminescha il guid, di grazia e surri cura che tuts applaudeschan.