Il parlament communal aveva decis l’atun passà che l’entira populaziun possia inoltrar pussaivlas parcellas a la vischnanca. Uschia èn vegnidas inoltradas nov propostas a la vischnanca. Da quellas aveva la vischnanca proponì da cumprar quatter. Las duas parcellas refusadas dal parlament communal sa chattan en la vischinanza da la staziun da Sedrun.
Parlament: Situaziun betg dramatica
Il parlament ha dentant betg stimà la situaziun tant dramatica sco la suprastanza communala e refusà la cumpra. Il president Martin Cavegn ha dentant accentuà che quai saja uschia en il process politic e quai resguardian els cumplain. La vischnanca haja dentant manchentà ina schanza unica, uschia Cavegn. Cunquai che la summa finala na surpassa uss betg pli in mez milliun francs, na vegnian ins betg ad ir avant radunanza da vischnanca. La cumpetenza da decider d’ina summa fin a mez milliun francs haja il parlament.
