Suenter l’abdicaziun da Robert Cajacob sco president communal da Mustér datti uss in emprim candidat. René Epp ch’è deputà da la Cadi cristiandemocrat ha inoltrà sia candidatura. Quai ha communitgà la cumissiun electorala. Il candidat stoppia anc vegnir nominà uffizialmain il proxim temp.
El fetschia gia dapi ditg politica communala, regiunala ed er chantunala ed uss saja el vegnì a la conclusiun ch'il post da president interessia el, uschia René Epp sin dumonda da RTR.
Plirs nums – mo pauc interess
Plirs candidats pussaivels han immediat ditg ch’els na veglian betg far president. Uschia na vulan ils represchentants actuals da la suprastanza communala betg star a disposiziun. Clemens Berther deputà e vice-president di cleramain ch’el n’haja betg il temp, Wendelin Jacomet e Jris Lombris na vulan betg e Victor Flepp ha era dà giu ses post sco suprastant. Sco interprendider manchia simplamain il temp da far politica en ina executiva, ha ditg Victor Flepp.
Iso Mazzetta na vul betg
Iso Mazzetta ch’è stà blers onns en suprastanza da la vischnanca da Mustér ha ditg envers RTR ch’el na veglia betg star a disposiziun. Uschia resta il mument René Epp, ch’ha 38 onns e lavura sco cussegliader da finanzas.
Il temp d’annunziar candidats scada ils 28 d’avust. Las elecziuns èn planisadas ils 27 da settember.