Ils 23 da december 2024, curta avant ils firads da Nadal è in tren da la viafier Matterhorn-Gottard svià sin la staziun da Tschamut. Dapi lura è il traffic da viafier sur il pass Alpsu limità. Quai vul dir che la staziun da Tschamut na po betg vegnir duvrada sco lieu d’entupada tranter ils trens. L'emna passada è il tren donnegià vegnì transportà ad Andermatt, ma ils donns vid il sviader ed ils dents da viafier èn gronds. Il mument sajan ils responsabels vid sclerir co agir en chaussa. Il problem saja l’empustaziun da la tocca per reparar ils donns, quai ha declerà il pledader da medias da la viafier Matterhorn-Gottard, Jan Bärwalde. Els sajan cun grond engaschi vidlonder da schliar il problem ma il mument na possian els anc betg dir quant ditg che las reparaturas vegnan a durar. Bärwalde stima ch'i giaja probabel emnas sche betg schizunt mais.
-
Bild 1 von 4Legenda: Ils dents èn donnegiads fitg suenter ch'in tren è svià sin la staziun da Tschamut. Christoph Berger -
Bild 2 von 4Legenda: Il mument èsi sulet pussaivel da traversar la staziun da Tschamut sin in binari. Il segund è donnegià fitg ed il mument spetga la MGB sin il material per pudair far las reperaturas. Christoph Berger
-
Bild 3 von 4Legenda: Il tren svià a la staziun da Tschamut. Quel è vegnì transportà ad Andermatt per far las reperaturas necessarias. Christoph Berger
-
Bild 4 von 4Legenda: Ils dents da la viafier èn vegnids donnegiads fitg, surtut tar la guntgida. Cura che quels pon vegnir reparads è il mument intschert. Christoph Berger
La viafier recumonda da quintar cun dapli temp da viadi
L’urari funcziuna era senza la pussaivladad d’entupar a Tschamut. Ma sche quai vegnia a retards, alura saja quai da quintar ch’ils trens stoppian spetgar. Quai ha la consequenza ch'i dat svelt retards ubain che trens crodan schizunt ora, ha declerà Jan Bärwalde. Perquai recumondian els da quintar cun dapli temp da viadi tranter Mustér ed il Pass Alpsu, sco era en l’autra direcziun. Davart ils motivs da l’incap sin la staziun da Tschamut na possian ins anc dir nagut. Quai vegnia uss sclerì per suenter prender las mesiras necessarias per ch’in tal cas na capitia betg pli, ha declera il pledader da medias. Durant ils dis da vacanzas ha la Matterhorn-Gottard registrà autas frequenzas sin la lingia, era blers sportists d’enviern. Uschia hajan els per las vacanzas da sport gia experientscha ed èn optimistics ch’il traffic da viafier possia vegnir garantì.