Las abitantas ed ils abitants vivan fitg derasà – e magari schizunt in pau zuppads – ed uschia na lascha era betg surstar, che la pli lunga ruta per reparter la posta en Svizra è en nossas valladas, en il pli grond chantun da la Svizra.
La postina Anna Egger entschaiva mintga di enturn las 6:00 e prepara tut las gasettas, brevs e pachets per sia ruta. Per ch'ella cuntanscha la finamira da reparter tut la posta enfin mezdi, sto ella adina esser en moviment. E tuttina na po ella en quel temp – ed en quels 103 kilometers – betg vegnir tar tut las chasadas en la vallada. Perquai survegn la postina sustegn d'ina collega che surprenda ina part da la scharscha e porta quella en ina part dals vitgs.
Da mantegner il servetsch saja fitg impurtant per la glieud en la vallada perifera, perquai che bleras autras purschidas han serrà ils davos onns. Vinavant saja per Anna Egger era bel dad esser en contact cun la glieud che sa legria adina puspè da baterlar cun la postina.