Val Stussavgia - In paus durant il temp hectic da Nadal

Tras l'auto da posta tuna la vusch d'ina dunna che annunzia: «Thalkirch, Gassli.» Qua sort jau da l'auto da posta. Jau sun arrivada en il davos vitg da la Val Stussavgia – a Thalkirch.

Naiv e glatsch cuvernan Thalkirch, e mes flad vegn sco in nivel or da mia bucca. Igl è fraid, il sulegl n'ha anc betg cuntanschì questa val. Las chasas qua èn situadas lunsch ina ord l'autra – e mo ina via stretga, gist avunda lada per in auto da posta, maina tras la val. Mia finamira è la loipa da Thalkirch, pia vom jau per lung da la via, ils mauns en satg.

Cura che l’auto da posta è partì, èsi tuttenina quiet.

Fitg quiet.

Tut enturn mai è alv – las muntognas, la via, ils tetgs da las chasas. Era la loipa ves jau pir cura che jau sun sin il parcadi pitschen nua ch'ella cumenza. Il parcadi davant la loipa è dentant vid, e la loipa è anc propi frestga. Jau guard enturn mai. Jau sun tut persula en la naiv tranter las muntognas autas, il tschiel senza nivels sur mai. Jau cuntinuesch, a la tschertga da glieud.

Plaun plaunet raiva il sulegl sur las muntognas, ma jau sun anc adina tut persula. Plaunsieu ma dumond jau, sche insumma insatgi enconuscha questa loipa – tut vesa ora uschè nov e frestg, sco sche nagin uman na fiss stà qua insacura.

Tut en ina giada vegn in auto enturn la curva. Ina dunna giuvna, cun chavels brins e vestgadira sportiva, sorta da l'auto cun ses skis da passlung. Ella è l'emprima persuna sin la loipa questa damaun! Ella ma raquinta, ch’ella haja cumprà ses skis avant trais onns e betg pli duvrà savens dapi lura, e perquai è ella qua oz.

Qua èn ins savens sulet, raquinta ella. Oravant tut cun far la gronda runda cun ils skis da passlung - alura sajan ins segir sulet. Il sulegl glischna sur la val, e ses skis fan ils emprims fastizs en la naiv.

In pèr chasas plinenvi entaup jau in um grond cun ina chapitscha da launa, che porscha skis da passlung da prender a fit. El ma prenda cun el en ses tschaler e mussa, nua che tut il material vegn lura a star. Il mument è numnadamain anc tut vid. Ils chalzers ed ils fists èn anc pachetads en satgs, ed era ils skis n'èn anc betg pronts.

Tuttina n'ha el nagina prescha. El viva gia sia entira vita qua, raquinta el a mai. El sappia che la stagiun cumenzia pir suenter Nadal – ed ensumma, tut ils restaurants sajan anc serrads.

El svida ils satgs nairs e cumenza a sortir ils chalzers. L’emprim sto el chattar ils pèrs, e suenter als metta el tut tenor grondezza en ses tschaler. I dat chalzers fitg pitschens per uffants da quatter onns, fin a chalzers gigants cun la grondezza da 50.

Jau vom vinavant. Igl è gia suentermezdi cura che jau entaup finalmain trais autras persunas – in um giuven, che tira dus uffants sin ina scarsola. En quel mument turna la dunna che jau hai vis a l'entschatta. Spert chatt jau ora ch'els tutgan ensemen – quai è ses um e ses uffants. Ella prenda sin bratsch in dals uffants e ri ventiraivel.

Uss vuless ella anc ir a spass cun sia famiglia, di ella. Ella, ses um ed ils dus uffants sa mettan sin via – ed uschè spert è la loipa puspè vita.