La stad passada han ins pudì observar savens plirs tschess cularins a trair lur rudels sur la Surselva. Ils ultims onns sajan las observaziuns da quest utschè s’augmentadas, declera Livio Rey da la Staziun ornitologica svizra da Sempach. Suenter in project da repopulaziun en Frantscha sajan ils utschels surtut stads da vesair en il vest da la Svizra, ma pli e pli sa derasian els era vers l’ost ed uschia en il Grischun.
Utschels na cuan betg, ma tschertgan communabel vivonda
Ils utschels ch'èn da vesair en il Grischun, èn utschels giuvens che na cuvan betg anc. Uschia bandunan quels alura l’atun las alps svizras, perquai che la vivonda manca. Pussaivel fissi bain ch’els cuassan er ina giada en Svizra - il mument n'è quai dentant betg il cas. Ils utschels gronds sa nutreschan sulettamain da cadavers ed els n'èn nagin privel per ils umans. Sch’ins observa dapli che tschintg gronds utschels da rapina en il medem lieu, alura pon ins esser segir che quai èn tschess cularin. Els èn numnadamain fitg socials e interageschan er en lur communitad. Per distinguer els dal tschess e dal tschess barbet ston ins observar la cua: Tar in tschess cularin na vesian ins strusch la cua - tar in tschess ed in tschess barbet saja adina da vesair la cua, declera Livio Rey.