Administraziun e suprastanza duain s'engaschar per il project casti da Putnengia. La radunanza da vischnanca da Tujetsch ha cun in stretg resultat dà suatientscha a la dumonda consultativa correspundenta. En tut eran 37 persunas preschentas a la radunanza da vischnanca la mesemna saira.
Cunquai che sulet trais vuschs han fatg la differenza ha il president communal Martin Cavegn annunzià che la suprastanza vegnia anc a discutar sch’els veglian propi persequitar vinavant il project. La decisiun da la suprastanza è previsa da prender l’emna proxima.
La dumonda consultativa pertutga sulet in engaschi da l’administraziun en favur da recaltgar ils daners necessaris tar sponsurs e donaturs. Daners communals na pon betg vegnir impundids per il project.
Lunga istorgia da la tur da Putnengia
La ruina da Putnengia è ina tur or dal temp medieval ed ella è la sedia da la schlatta dals da Putnengia. La persunalitad la pli enconuschenta da questa schlatta è Pieder da Putnengia, avat da la claustra da Mustér ed ina da las trais persunas ch’aveva engirà il 1424 sut l’Ischi a Trun. La tur è vegnida renovada avant paucs onns dal Forum Cultural Tujetsch e la finamira da quel è gia dapi passa 20 onns da reconstruir sin l'areal ina tur da lain.
Dentant, il mument ha la construcziun da l’archiv cultural prioritad per l’uniun e las resursas per in proxim project mancan. Perquai han la vischnanca e la suprastanza communala da Tujetsch prendì enta maun il pensum da recaltgar ils daners en il num dal Forum Cultural. Ma, la radunanza da vischnanca dals 6 da december 2023 ha renvià la dumonda da prefinanziar tut cun daners communals, daners ch’il Forum Cultural avess gì da pajar enavos. Dus mais pli tard ha il project alura, malgrà tut, survegnì la lubientscha da construcziun.
Tge critica datti cunter il project?
Per Bruno Berther, ch’abitescha a Rueras, èsi cler ch'i na dovria nagina tur da lain tar la ruina da Putnengia. El saja s’exprimì a la radunanza da vischnanca dal december en favur da stritgar l’entir project e surtut l’agid finanzial communal. Uss cuntinueschia la vischnanca cun questas lavurs, quai na correspundia betg a la veglia dal pievel, di Bruno Berther. Per el saja cler che la decisiun democratica saja da respectar e che la vischnanca veglia en questa chaussa simplamain sfurzar atras il project. Uschia vegnia el era a s’exprimer a la radunanza da vischnanca da mesemna saira ils 22-05-2024 cunter il project, di l’um pensiunà ch’ha quasi vivì vita duranta a Rueras e che vegn or da la famiglia dals proprietaris da terren. Entant posseda ses frar la ruina da Putnengia.
Uss vegn tut realisà senza daners communals, sche insumma
In punct saja cler, l’entir project vegnia realisà cun daners da sponsurs e donaturs e senza daners communals, accentuescha Guido Monn, suprastant da la vischnanca da Tujetsch. La dumonda che la radunanza da vischnanca da Tujetsch haja da respunder a la radunanza da vischnanca da mesemna saira saja uschia, sche la vischnanca possia cuntinuar a ramassar ils daners en favur dal project ed en num dal Forum Cultural. Sche la radunanza da vischnanca renvieschia danovamain la dumonda alura saja il project giud maisa, di Guido Monn.
