La radunanza communala da Tujetsch ha approvà mesemna saira cleramain duas fatschentas. Per l'ina la lescha davart il provediment d'aua da la vischnanca e per l'autra la lescha davart la dismessa d'aua persa da la vischnanca Tujetsch. Las duas leschas han stuì vegnir tractadas perquai che grondas parts da quellas eran vegnidas abolidas tras il dretg surordinà chantunal. Er avevan ils ultims dus onns plirs possessurs da segundas abitaziuns inoltrà recurs encunter lur taxaziun. Uschia han els fatg valair che las taxas actualas da dismessa d’aua e d’aua na correspundian betg pli a las leschas actualas. Els han fatg savair da trair la fatschenta fin al Tribunal federal, scriva la vischnanca da Tujetsch en ses messadi. La pretensiun centrala è ch’il dretg federal pretendia che tuttas taxas han da sa basar sin il principi da chaschunader. Perquai ha la vischnanca da Tujetsch revedì las duas leschas.
Novas leschas confurmas a dretg surordinà
Las novas leschas approvadas da la radunanza communala prevesa trais furmas da taxas. Per l’ina la taxa fundamentala, per l’autra la taxa da consum ed in tschains annual per il dumbrader che vegn montà. Ils dumbraders vegnan mess a disposiziun da la vischnanca per in cust annual da radund 30 francs. La taxa annuala sa basa sin la surfatscha da parcella e la taxa da consum sin la quantitad mesirada. Las leschas novas van en vigur a partir dal prim da schaner 2026.