L'artist ha, ensemen cun ina gruppa da gidanters, realisà in nov maletg per il bogn Sedrun. Da vesair èn delfins, tartarugas e corallas. L’idea da basa saja vegnida da la cumissiun e la finala haja «Bane» fatg pliras propostas, declera il suprastant Guido Monn. El è responsabel per l’entir process da renovar.
Da vegnir d’engaschar l’artist na saja dentant betg stà simpel. Sco emprim haja «Bane» manegià ch’els na possian betg far il project pervi da mancanza da temp. Ma a la finala èsi tuttina gartegià e la cumissiun è fitg satisfatga dal resultat e ch’els hajan pudì engaschar in artist da renum internaziunal, di Guido Monn.
Avertura ils 19 d’october 2024
Las lavurs vida il bogn Sedrun van uss en la fasa finala. L’aua saja gia stada en il bogn grond d’atschal cromà per guardar sche tut funcziuna. Uss vegnan anc fatgas pitschnas chaussas. La finamira è d’avrir il bogn ils 19 d’october ed il mument saja tut sin buna via, declera Guido Monn. Era cun las finanzas vegnan els da star en il budget communitgà. Uschia na surpassian els betg ils 12,4 milliuns francs approvads. Da tegnair en il budget saja stà la pli gronda sfida, sper tut il bajegiar, accentuescha il suprastant da la vischnanca da Tujetsch.
