Sedrun e la val Tujetsch èn surtut enconuschents per il sport d’enviern ed il territori da skis. Dentant cura ch’igl è mal’aura datti era gia dapi 50 onns in program alternativ – il bogn cuvert. Il matg 2022 ha la vischnanca decis da sanar e renovar il bogn. Uss, quasi in onn e mez pli tard, èn gia vegnidas fatgas grondas lavurs e tgi che passa il mument sperasvi, vesa ch’i marscha insatge.
Las fanestras dal bogn èn gia in temp svanidas. Dad ordadora vesan ins nua ch'il bogn era anc avant in mez onn. Suenter bun 50 onns manaschi hai duvrà ina sanaziun, oravant tut da la vart tecnica.
Però er ils basegns e giavischs dals osps èn sa midads sur ils onns. I duaja dar dapli spazi per divertiment e per recreaziun en il futur. La gronda midada va dad endadens ordavert e puspè enavos en il bogn. Igl è ina ruschnera che po purtar bler divertiment als uffants che visitan il bogn a Sedrun. La reavertura è planisada per l'october 2024.
