En Tujetsch datti in lieu enconuschent da viandar: sin l’alp Caschlè sin 2249 m. In’attracziun è ina platta da 5 sin 4 meters sin quest’alp che vegn numnada: La platta dal barlot. Tenor la ditga sautavan las strias sin quella.
Strias han fatg vendetga
La ditga raquinta ch’il plevon tuatschin Giachen Biarth ha benedì la platta e suenter han las strias fatg vendetga. Ils 7 da favrer 1749 è el mort, cura ch’el ed in pèr umens vulevan gidar ils abitants da Rueras, nua ch’ina lavina era vegnida giuadora. Sur Giachen è vegnì en la lavina da Londadusa che ha destruì ina part dal vitg da Zarcuns e quatter persunas èn mortas. Sco l’archivari tuatschin Tarcisi Hendry di, saja quest schabetg documentà bain.
Fastizs da las strias
La ditga raquinta era ch’ins vesa fastizs da las strias sin la platta e che quella saja vegnida transportada natiers (dal Culmatsch u dal Badus) sin in fil da saida u schizunt sin ina taila-filien.
Tarcisi Hendry di che blers vulan empruvar ora la platta, vul dir durmir sin quella e guardar, sch’ins sa dasda alura sper ella. El haja era empruvà ora quai, ma senza success.