Normalmain fissan las uniuns e musicas da tschaiver uss en la fasa intensiva da preparar ils tils e las occurrenzas da tschaiver. Il mument ruaussan dentant las preparativas dapertut. Il coronavirus chaschuna ina pausa sfurzada.
Spetgar e sperar
En Surselva, nua ch'il tschaiver ha ina pulita muntada, spetgan ils responsabels sin megliers temps. Sch'i dat musica da tschaiver il proxim temp è pli che intschert. Ils tils che vegnan normalmain organisads, èn per gronda part gia annullads. Las uniuns speran ch’il virus sa quieteschia il proxim temp.
Programs pitschens ed alternativs
A Glion avev’ins reintroducì l'onn passà il til da tschaiver. Per quest onn è el gia annullà.
Nus vulevan elavurar in concept da segirtad per il til. Uschè spert sco las prescripziuns sa midan il mument, na savain nus betg sche quai vala anc en dus mais. Perquai avain nus desditg il til.
Er a Trun è il til gia annullà. La musica da tschaiver spera dad almain savair far ina tura tras il vitg.
Sch’igl è pussaivel il schaner da far insatge, alura faschessan nus en il vitg concerts da plaz u pitschnas turas, dentant betg cun autras musicas da tschaiver.
A Mustér ha dasper il til era la «Dretgira nauscha» ina gronda muntada. La dretgira truescha a la fin da lur sentenzias mintgamai ina chaussa u in fatg dal davos onn a la mort. Fertant ch’il til è sco en ils auters lieus gia annullà, n'èsi anc betg cler sche e co la «Dretgira nauscha» vegn producida.
La dretgira viva da la interacziun cun il public. Nus essan vidlonder da rimnar ideas, co ch'ins pudess manar atras quella occurrenza. En dumonda vegn er da far ina producziun digitala.
Cun il patratg ch'il tschaiver pudess er dar dal tut en l'aua, na vulan las uniuns da tschaiver il mument anc betg sa fatschentar.
