L’onn sontg cumenza tradiziunalmain ils 24 da december 2024 e cuzza fin ils 6 da schaner 2026. L’onn actual sontg stat sut il motto «Pelegrins da la speranza» ed è vegnì convocà dal papa Francestg. Per celebrar quest onn sontg han era las plaivs fatg lur ponderaziuns. Per exempel a Trun nua che la plaiv ha communabel cun sur Tomasz Drwal realisà ina porta sco simbol per quest onn. El haja gì spontan quella idea da mussar cun ina porta la muntada da l’onn sontg, la porta cun trais differentas entradas sco simbol che mintga uman saja bainvegnì en la baselgia, declera sur Tomasz che pastorescha gia dapi 17 onns la plaiv catolica da Trun.
Porta stat l’entir onn sontg davant baselgia
Dasper la porta duai era restar la speranza, di sur Tomasz. La speranza saja probabel quai che collia l’umanitad, numnadamain la speranza en ina buna vita qua sin terra, ma era la speranza da chattar bunas relaziuns cun ils auter umans e la finala era cun Dieu. La porta saja in simbol da l’avertadad da la baselgia, era sche quai dettia conflicts sin l’entir mund, ma er en la baselgia saja la porta il simbol per chattar soluziuns e quai vulevia el mussar cun quella porta davant baselgia. Ella è era sumeglianta a l’architectura da la baselgia, pia ina porta per Trun, ma era per l’entira umanitad, uschia declera sur Tomasz.
