Trun Cultura - 100 onns Matias Spescha – dialog artistic cun Gaspare O. Melcher

L'idea da l'exposiziun è da crear in dialog tranter Matias Spescha e mintga artist participà, empè da metter tut las ovras ensemen. Questa metoda permetta d'explorar las relaziuns individualas e las parallelas tranter ils artists. E per Venice Spescha, la curatura e figlia da Matias Spescha, èsi la finala stà ina surpraisa che las ovras han ina colliaziun e s’augmentan quasi. Era sche Gaspare O. Melcher e Matias Spescha eran differents artists, han els ina tscherta basa communabla che vegn per l’emprima giada visibla en in'exposiziun.

Per Gaspare O. Melcher è Matias Spescha ses frar grond

Gaspare Otto Melcher è creschì si en l’Engiadina Bassa ed abita gia dapi blers onns en la Toscana. Il 2013 ha el creà omagis a differents artists ch’han inspirà e fascinà el, in da quels è Matias Spescha. El haja sulet ina giada gì il cletg da s’inscuntrar cun Matias Spescha, ma suenter in lung discurs haja el vis ch’els lavurian atgnamain cun la medema idea fundamentala, numnadamain els mussian omadus il mund visibel ed il mund nunvisibel. Perquai haja el gì quasi in frar grond en Matias Spescha quai che pertutga l'art. Uss pudair exponer ovras communablamain saja ina gronda satisfacziun, di Gaspare O. Melcher.

In onn da festivitads

Il giubileum da 100 onns da Matias Spescha vegn festivà durant l'entir onn en il Spazi Spescha. La finamira è da render attent sin l’influenza e ses legat durabel. Ses art cuntinuescha d'inspirar numerus artists da persequitar lur via artistica senza guardar dretg u sanester.