Tut las sutgas en la sala da gimnastica a Trun eran emplenidas, cura che la societad da musica ed il duo Alexi e Marcus han cumenzà il concert cun la chanzun «Salischina». Ina da las quatter chanzuns ch’èn vegnidas arranschadas per musica da brass e per il duo da chant sursilvan. Arranschà ils tocs ha l’enconuschent dirigent Corsin Tuor, era oriund da Trun. E quai na saja betg simpel d’arranschar tocs da chantauturs, nua ch’il text chantà gioga ina gronda rolla. Ma la collavuraziun cun Alexi e Marcus e cun la musica da Trun saja stada fitg buna ed er il resultat, ha manegià Corsin Tuor suenter il concert.
L’idea da realisar in concert communabel cun chanzuns dad Alexi & Marcus è vegnida or da las retschas da la societad da musica da Trun, ha il dirigent Adrian Degonda ditg. Atgnamain n'haja el betg quintà ch’il duo veglia insumma concertar communabel cun la musica, ma els hajan immediat dà suatientscha al clom. Ed alura saja era stà cler da dumandar Corsin Tuor per ils arranschaments. E quels sajan gartegiads fitg bain, hai gì num da tut ils responsabels suenter il concert.
-
Bild 1 von 6. Tuts cuntents suenter il concert: (da sanester) Corsin Tuor, Adrian Degonda, Alexi Nay, Marcus Hobi, Gion Simeon e Clau Maissen. Bildquelle: RTR.
-
Bild 2 von 6. Marcus Hobi durant il concert communabel cun la societad da musica Trun. Bildquelle: RTR.
-
Bild 3 von 6. Alexi Nay ha chantà las chanzuns enconuschentas. Bildquelle: RTR.
-
Bild 4 von 6. La societad da musica Trun en cumplaina acziun. Bildquelle: RTR.
-
Bild 5 von 6. La societad da musica Trun è in'uniun cun blers commembers, era pli giuvens. Bildquelle: RTR.
-
Bild 6 von 6. Adrian Degonda, il dirigent da la societad da musica Trun, en cumplaina acziun. Bildquelle: RTR.
Musica è era pronta per la festa chantunala da musica
Durant il concert è vegnì dà ils quatter tocs communabels, ma era tocs che Alexi e Marcus han sunà persuls e tocs che la musica da Trun ha sunà persula. Ina da quellas cumposiziuns è il toc «Legenda Rumantscha» – in toc enconuschent per musica da brass che la musica vegn a sunar a la festa chantunala da musica ils 9 da zercladur a Claustra. E sco Adrian Degonda ha ditg suenter il concert, saja la meglra versiun vegnida mussada gist da concert e quai saja natiralmain grondius.
Per vegnir da realisar ils arranschaments sco er ils ulteriurs tocs ha la musica exercità bleras uras, e durant in champ era cun Corsin Tuor. Quai saja stà in intensiv trenament pli lung nua che la musica ha pudì far in pass enavant. E quai haja la finala motivà las musicantas ed ils musicants d’exercitar dapli a chasa, e quai sentian ins uss tar il resultat, di Adrian Degonda. Ed il public ha remunerà la prestaziun cun ina «standig ovation» a la fin dal concert e cun in ferm applaus.