Territori da skis a Laax - En colonna cun 1,5 meters distanza

Durant ils dis da festa han blers chattà la via en il territori da skis a Flem – Laax – Falera. Per exempel la sonda ils 26 da december è l’entir contingent da cartas dal di stà vendì ora. Tenor l’app «Inside Laax» sajan quai di pli che 8’000 persunas stads sin las pistas dal territori da skis. Per cumparegliar: L'onn passà hai gì tranter Nadal e Bumaun dis cun enturn 18'000 persunas en il territori.

Take-away sin ils pes

Las ustarias che dattan normalmain puspè chaud suenter in avantmezdi en la naiv n’èn betg avertas. Persuenter datti intgins indriz da take-away nua ch’ins po cumprar fast-food sco chicken nuggets, pizza u pasta. Da magliar èsi dentant sin ils pes. Ils plazs da seser èn tatgads giu uschia ch’igl è da magliar en il liber, en pe u giun plaun en la naiv.

Tut vegn surveglià

En ils hotspots nua che blera glieud sa rimna normalmain – sco per exempel a Laax Murschetg u era sin il Crap Sogn Gion – èsi da chattar persunal da fatschentas da segirezza che guardan minuziusamain che la glieud porta a tut il temp la mascra da protecziun. Tenor ina persuna dal persunal da segirezza sa tegnia la glieud fitg bain vid l’obligatori da mascras che vala sin l’entir areal da l’Arena Alva.

Era datti pliras persunas che guardan che las distanzas en las colonnas per la sutgera vegnan resguardadas. En la gondla gronda sin il Crap Sogn Gion stat medemamain ina persuna che controllescha che tuts portan ina mascra. Malgrà che mo 2/3 dastgan ir en la gondla direcziun Crap Sogn Gion, paria tuttina che la distanza dad 1,5 meters n’è surtut la damaun betg realisabla.