L’uniun da teater Sagogn è enconuschenta quasi sur ils cunfins da la Surselva per las inscenaziuns savens umoristicas. Quai saja era mintg’onn la finamira da porscher al public ina saira divertenta ed in zic pensiva, ma surtut da pudair s’inscuntrar e passentar ina bella saira, di il reschissur Manfred Veraguth. El ha quest onn perquai tschernì il toc «Tuttenina milliunari» («Drei Männer im Schnee») da Erich Kästner. Inscenar in toc fitg enconuschent ed adattar el al temps ed a las actuars ed ils acturs saja stà las trais gronds sfidas, di il reschissur che maina gia blers onns la reschia da l’uniun da teater Sagogn.
Mintg’onn cun in nov toc pretensius
L’uniun da teater Sagogn sa cumpona da pliras persunas che veglian propi era far teater e saja fitg motivadas, quai la basa per insumma pudair inscenar mintg’onn in toc, accentuescha Veraguth. Per el sco reschissur saja quai mintgamai in privilegi da pudair lavurar cun la gruppa ma era in tschert squitsch da pudair porscher a las persunas motivadas in interessant toc. Ma uss sajan els madirs da propi ir sin tribuna e mussar al public l’inscenaziun, di Manfred Veraguth.
