In clavà pudess mussar il meglier la chasa rusticala sco el s’imaginava co la chasa d'aug Gieri vesia ora. Il clavà ch'els han chattà è il clavà da Gion Dumeni Beeli, gest sut il chastè da Aspermont.
«Giugar en in clavà, quai ha atgnas leschas. Per exempel quai che appartegn il tun», di Manfred Veraguth. Sche in auto ni ina maschina da purs giaja sperasvi, saja quai sco integrà en il toc. Betg d’emblidar ils grigls che dattan tut quai ch’i pon, e quai l’entira saira. Era il fraid en stalla è da cumparegliar cun dadora.
Ils dals avantatgs da giugar en in clavà è dentant per exempel ch'ins po parter en tut auter il temps d’exercizi che en la sala da scola, nua ch'igl è da parter la sala cun autras uniuns.
Il toc che vegn dà quest onn a Sagogn è «La valischa d’aug Gieri». Ina cumedia da Pat Cook e Dieter Jorschik, translatada da Manfred Veraguth.
«La valischa d’aug Gieri» è ina cumedia cun bler tempo ed acziun, nua che la parentella fa plitost ina paupra figura. Cura che aug Gieri envida tuts per ina fin d’emna en sia chasa, teman ils parents l’emprim ch’el dovri forsa raps. Silsuenter ston els tadlar senza fin istorgias da pli baud ed anecdotas da ses amis Clau Clavella, Serafin Pipa e Clemens Cluntga. La fin d’emna tranter parents para da daventar talmain lungurusa – fin che aug Gieri entschaiva tuttenina a raquintar d’ina valischa...
