Surselva - Val Strem: var 250’000 cubics vegnan a val

Entras models dal territori han ins quintà ora tge territori ch’è pertutgà sche tut quest material vegn a val. Sin fundament da questas calculaziuns han ils experts infurmà ils responsabels da la vischnanca, l’energia alpina e la corporaziun Aua cristalla quant lunsch ch’els dastgan laschar ir lavurers en la val. La bova ch’è vegnida a val avant var trais emnas e numnadamain ruschnada var in kilometer da la val ora ed ha sutterrà pliras tschiffadas d’aua per far energia respectivamain tschiffadas dal provediment d’aua.

Val resta serrada

Era sch’igl è ussa cler fin nua ch’igl è segir en cas d’ina ulteriura bova, resta la val serrada. Quai ha il president da vischnanca Beat Roeschlin ditg explicit. Il privel da singula crappa u bain bovas pli grondas è memia grond . Il geolog Yves Bonanomi na sa betg dir cura ch’il material ch’è schluccà vegn a vegnir. Mo el quinta che quai pudess anc capitar questa primavaira. Ins auda e vesa numnadamain adina puspè ch’i croda crappa. Sco Yves Bonanomi ha ditg è il terren per part sa muventà per 20 meters l'ultim temp. Il vitg da Sedrun saja dentant mai stà periclità e saja er betg periclità tar ulteriuras bovas en la Val Strem.

Concept da segirezza

Co i vegn ad ir vinavant sto la vischnanca anc decider. Lezza po ussa far in concept da segirezza per dar liber als lavurers da l’Energia Alpina e da l’Aua cristalla dad ir mo uschè lunsch en la val sco quai ch’il geolog recumonda. Ultra da quai sto la vischnanca far ponderaziuns tge che capita cun la sbuccada da l’aual da Strem en il Rain en cas da plievgias intensivas che manassan bler material tar la sbuccada e chaschunassan inundaziuns.