Cun ina occurrenza publica ha l'organisaziun Surselva Turissem infurmà tge che cura e passa turisticamain il proxim enviern. Surselva Turissem è ina da las quatter organisaziuns da turissem ch'i dat en Surselva sper quellas da «Flem-Laax-Falera» «Mustér-Sedrun» e «Vals». Purtadras da Surselva Turissem èn las vischnancas da Breil, Sursaissa, Lumnezia e Glion e las pendicularas da Breil e Sursaissa. Affiliadas èn las vischnancas da Trun, Sumvitg e Stussavgia. Per l’emprima giada hai dà in'infurmaziun cun e per tut quels che han da far insatge cul turissem d’enviern.
Blers projects sin via
Las infurmaziuns èn vegnidas da Surselva Turissem, da las pendicularas da Breil e da las pendicularas da Sursaissa. Tranter auter han ins udì ch’igl è davent d'immediat pussaivel da cumprar bigliets da las pendicularas da Breil sur l'app da Surselva Turissem. Plinavant è vegnì annunzià che las pendicularas da Breil planiseschan ina nova gondla da Breil sin l'Alp Dado e che las pendicularas da Sursaissa han en mira da sviluppar lur territori envers l'Um Su e la finala che la pendiculara tranter Glion ed il Piz Mundaun n ’è anc betg giud meisa.
Nus essan cun blers projects en la fasa da la planisaziun dal territori, ina procedura che cuzza ditg. La finala quinta dentant mo quai che vegn realisà.
Il mument persequiteschan ils responsabels, schi fiss pussaivel d'introducir in curs d'auto da posta per la ruta Glion-Breil-Sursaissa-Glion. Quai sco curs regular ed en omaduas direcziuns.
Infurmaziuns era per ils proprietaris da secundas abitaziuns
Suenter la revisiun da la lescha da turissem l'onn 2014, nua ch'i ha dà in augment da taglia per ils possessurs e las possessuras da secundas abitaziuns, eran quels per part ids sin las barricadas. En il fratemp è la situaziun calmada.
L'onn 2014 essan nus ids el foss ed avain sajettà, perquai che nus n’eran betg cuntents. Ussa essan nus vegnids ord quest foss e vulain utilisar la communicaziun. Quella è uss buna.
L'infurmaziun che ha gì lieu a Danis è suenter l'occurrenza vegnida taxada sco success tant dals responsabels da Surselva Turissem sco era dal president dals possessurs e da las possessuras da secundas abitaziuns.