Surselva - Trun: «Casa Carigiet» ha donn total

Il suentermezdi curt avant las 16:00 ha la polizia chantunala survegnì l'alarm ch'i dettia fieu sin in lautget en ina chasa da pliras persunas a Trun. Il bajetg è datiers da la baselgia parochiala. Tar il bajetg ch'è brischà sa tracti da la chasa Carigiet, la chasa paterna da Zarli ed Alois Carigiet. La chasa datescha da l'onn 1769 e vala sco bajetg istoric a Trun.

Naginas persunas blessadas – donn total da la chasa

Tenor la Polizia chantunala sajan radund 10 persunas che sa chattavan en la chasa vegnidas evacuadas u hajan pudì bandunar sezzas quella. La situaziun saja stada bainprest sut controlla ed i dettia nagin privel per ils bajetgs en il conturn. La chasa na saja betg pli abitabla. Ils abitants hajan però chattà suttetg tar parents u en hotels.

I ha dà bler fim ord il tetg da la chasa. En acziun èn stads radund 70 pumpiers da Trun e Sumvitg sco er da Sursassiala. Lezs han stuì stgarpar davent parts dal tetg per pudair stizzar il fieu da surengiu. La notg è stada en funcziun ina guardia da fieu.

Il bajetg è donnegià totalmain. Las 2 auzadas sisum èn devastadas. Las auzadas suten hajan donns d'aua considerabels . Las raschuns per il fieu n'èn anc betg enconuschentas. Ils spezialists da la Polizia chantunala cumenzan las investigaziuns la mesemna bunura.

Il traffic da la via principala che maina gist dasper il lieu da l'incendi or vegn reglà entras ils pumpiers. Igl è però pussaivel da passar. Quai suenter che la via è stada serrada per pliras uras ed il traffic è vegni svià.

Guido Carigiet e Carli Albin sa regordan da la «Casa Carigiet» dal temp ch'els en creschids là.

RR novitads 17:00 ++