Legenda:
Il logo da l’83avla sessiun internaziunala dal Parlament europeic da giuvenils.
mad
cuntegn
Surselva - Parlament europeic da giuventetgna a Laax
A Laax s’entaupa davent dals 7 enfin ils 16 d’october il Parlament europeic da giuventetgna per la 83avla sessiun internaziunala. Dapli che 300 giuvenils ord l’entira Europa discurran quels dis sur da problems actuals.
«Ideas giuvnas ed innovativas per in avegnir durabel» – quai è il tema sur dal qual pli che 300 giuvenils ord pli che 40 differentas tiaras da l’Europa vegnan a discutar durant 10 dis a Laax. Per la destinaziun Flem Laax Falera munta quella sessiun betg mo 3’000 enfin 4’000 pernottaziuns dapli durant in temp da l’onn plitost ruassaivel. Per la destinaziun è quai era ina schanza da far reclama. Il directur da turissem André Gisler spera perquai, ch’ils giuvenils hajan in bel temp a Laax e turnian pli tard ina giada per far vacanzas.
Naginas construcziuns spezialas
Per manar tras quella sessiun tanschan las localitads ch’èn gia avant maun. La sala dal parlament vegn installada en l’hotel Riders Palace, las parlamentarias ed ils parlamentaris dorman en ils hotels el conturn dal lieu da sentupada. Sulet per la saira da gala, ina saira cun circa 500 osps, vegnia il restaurant da la staziun Crap Sogn Gion averts spezialmain, di André Gisler.
Parlament europ. da giuvenils
Avrir la boxSerrar la box
Il Parlament europeic da giuvenils è ina organisaziun da giuvenils da l'Europa che partan la passiun per la politica europeica e per il barat internaziunal. Las finamiras èn: Far attents ils giuvenils sin problems da l'Europa, promover il dialog intercultural, sviluppar la persunalitad dals giuvenils e porscher ina plattafurma per s'exprimer.
Legenda:
André Gisler, il directur da turissem da Flem Laax Falera.
ANR
