Sin squitsch da la vischnanca da Mustér è numnadamain la cunvegna da prestaziun tranter Mustér Sedrun Turissem (SMT) e las Pendicularas da Mustér vegnida visada sin l’avrigl 2017. Dapi 2014 è il biro da turissem a Mustér numnadamain integrà tar las pendicularas e tar il spurtegl da la Viafier retica . Cun ina cunvegna da prestaziun avevan las Pendicularas Mustér surpiglià ils dus biros e la tgira da l’infrastructura d’informatica e da telefonia da SMT.
Indigens betg cuntents
Cunzunt pervi dal biro en ils stabiliments da las Pendicularas Mustér, dettia quai grondas discussiuns, declera Francestg Cajacob, president communal da Mustér. «Ils hoteliers en il vitg teman simplamain ch’i dettia in conflict d’interess e la posiziun da monopol da las pendicularas sche tut sa concentreschia a S. Catrina»
Sco quai che l’acziunari principal da las Pendicularas Mustér Marcus Weber di, na chapeschia el betg questa decisiun. «80% dals giasts da vacanzas èn gia ad Acletta e mo 20% èn en il vitg.» Tenor Weber è quai la faussa decisiun. Pli fitg sa vilenta el dentant che questa visada è vegnida fatga be a scrit. «Mai vilenta ch’ins n’ha betg il curaschi da communitgar quai ordavant en in discurs.»
Francestg Cajacob conceda che la communicaziun na saja betg stada buna e ch’i fissi forsa stà meglier da tschertgar il discurs. El punctuescha dentant che la vischnanca e las pendicularas stettian malgrà quai en stretg contact.
Da la vart da Sedrun Mustér Turissem han ins reagì sin il squitsch da la vischnanca da Mustér, ha ditg Curdin Brugger, il president da SMT. La vischnanca da Mustér haja sur pli lung temp adina puspè fatg attent ch’ils lieus dals biros na cuntentian betg. SMT haja lura decidì da visar la cunvegna cun las pendicularas.
Contribuziuns
Consequenzas per SMT e pendicularas Mustér
Per las pendicularas munta quai ch’ellas vegnan ad ir pertutgant il marketing atgnas vias e betg sco quintà communabel cun SMT, di Marcus Weber. Ma era tar la purschida per la charta da giasts dettia quai probabel midadas. Las pendicularas na possian betg far ad SMT ina uschè buna offerta per laschar ir ils giasts gratuit cun la pendiculara. Quai saja be stà pussaivel grazia a las sinergias che sa resultavan cun il biro da turissem.
Gruppa da lavur
La vischnanca da Mustér ha ussa incumbensà ina gruppa da lavur cun represchentants dal turissem e da la vischnanca d'evaluar tge lieu ch'è il pli adattà per in biro da turissem a Mustér.