Marca e products communabels
A la radunanza da SMT ha il manader da fatschenta Hans-Kaspar Schwarzenbach preschentà ils plans. Per avair success veglian els crear in pool da marketing, ina marca e products communabels da Mustér – Sedrun – Andermatt. Products communabels pon esser: La Viafier Matterhorn Gotthard, ils pass sur las alps, il grond territori da skis communabel, l’aua cun la tgina dal Rain, la claustra da Mustér.
1.3 milliuns francs
Il preventiv è 1.3 milliuns francs, las finanzas duessan las pendicularas, las organisaziuns da turissem, la Andermatt Swiss Alps ed eventualmain era las trais vischnancas e la Viafier Matterhorn Gotthard metter a disposiziun.
L’emprim plan da marketing duess esser sin maisa la stagiun d’enviern 2018/19.
Pervia da quest model nov “cooperaziun plus” ha SDT sistì l’idea da crear ina societad d’aczias.
Co enavant cun Grischun vacanzas?
Il contract da Sedrun Mustèr turissem cun Grischun vacanzas cuzza anc fin la stad 2018. Suenter po el vegnì schlià per part; ed alura stoppian ins ponderar co enavant.
Valur da 20- 30 milliuns francs
A questa radunanza èn las cuminanzas d’interess dals possessurs da abitaziuns secundaras sa preschentads. La cumpart da questas abitaziuns è 52 % en la vischnanca da Mustér e 66 % en Tujetsch. Ils possessurs da abitaziuns secundaras genereschian ina valur da 20-30 milliuns francs (quai correspundia a 100-150 plazzas), èsi vegnì ditg. Els s’engaschian per transparenza cumplaina, infurmaziun averta e communicaziun ed els veglian tgirar e promover l’identitad e la qualitad, han ils possessurs da abitaziuns secundaras ditg.