Surselva - La nova ustaria Ogna dal campadi a Trun è averta

La nova ustaria «Ogna» sa chatta el bajetg principal dal campadi. Ella porscha plaz per 40 enfin 45 persunas e posseda in buffet, ch'è el medem mument era ina pitschna bar ed in kiosc. En ina construcziun annexa èn integradas las tualettas ed insaquantas duschas.

Bajetg sanitar anc betg finì

Atgnamain era previs d'avrir ensemen cun l'ustaria era il segund bajetg cun dapli installaziuns sanitaras per ils campaders. Quai bajetg cun ulteriuras duschas, tualettas e pussaivladads da lavar resti, n’è dentant anc betg finì. Il stgavament per il fundament haja cuzzà pli ditg che planisà e duas giadas haja il fundament betg savì vegnir betunà pervia da naiv.

Il gestiunari dal campadi Ruedi Wanninger quinta, che quai segund bajetg saja finì vers la fin zercladur. Sche las tualettas da l’ustaria na tanschian betg en il fratemp, vegnia el ad installar ina schliaziun provisorica cun tualettas mobilas.