In dals stgazis da l’archiv cultural èn fotografias e films veglias. Plinavant di Walter Deplazes ch’els veglian era rimnar cudeschs che tractan fatgs da la vischnanca da Sumvitg sco era relaschs privats. Bleras persunas pli passadas hajan forsa scrit poesias ubain tocs da teater.
Engaschi da commembers
Las lavurs per quest archiv vegnan fatgs tant sco pussaivel dals commembers da l’uniun Archiv cultural Sumvitg. Quella vegn fundada ils 31 da schaner ; e quest di vegn la populaziun e tut las persunas interessadas infurmadas da quest project.
La finamira saja da realisar in cudesch da fotografias e far ina exposiziun cun quellas ed auters documents interessants, ed alura era edir publicaziuns sur da l’agricultura ubain auters fatgs da la vischnanca da Sumvitg.
Ina pagina d'internet
Impurtant saja era da digitalisar tut ils documents e da crear ina pagina d’internet. Uschè èsi pussaivel da sa colliar cun auters archivs culturals dal Grischun.
L’archiv cultural vegn endrizzà en in local en la chasa da scola a Surrein. La vischnanca duai finanziar quest project che custia plirs dieschmillis francs, sco Walter Deplazes di.