L’animal da rapina n'è betg pir in tema dapi ch'in luf ha stgarpà la primavaira danovamain nursas en Surselva. A la discussiun da podium organisada da la PCD Surselva èn lura era passa 100 persunas da l'entira Surselva vegnidas, per gronda part purs ch'han sez nursas. Sin il podium eran cusseglier guvernativ Mario Cavigelli ed il pur Lucas Arpagaus da Trun per pudair sajettar lufs che fan problems, il president da WWF Grischun Beat Deplazes ed il bostger da Trin Christian Malär represchentavan la posiziun da betg sajettar lufs problematics.
Discussiun averta e directa
La discussiun è stada emoziunala. I è vegnì discutà avert, direct e tranteren era dir, il nivel è dentant adina stà correct ed orientà al tema. Mario Cavigelli ha preschentà sco manader da l’ Uffizi da chatscha e pestga dal Grischun la finamira dal chantun. Lez vul decider independentamain da la Confederaziun sch’in luf po vegnir sajettà ni betg. Il president dal WWF Grischun Beat Deplazes ha dentant punctuà la posiziun, ch’il luf saja anc adina ina spezia protegida e na possia uschia betg vegnir sajettà er betg en cas excepziunals. I dettia auters instruments per proteger las nursas.
RR actualitad 12:00