-
Bild 1 von 4Legenda: La scola da Mustér è stada bandunada oz. RTR, Gionduri Maissen -
Bild 2 von 4Legenda: Sulet in pass maina a l'entrada da la scola da Mustér. RTR, Gionduri Maissen
-
Bild 3 von 4Legenda: Sulet ina persuna è stada oz en scola da Mustér. RTR, Gionduri Maissen
-
Bild 4 von 4Legenda: Il mantun da naiv davos la scola da Mustér – entrar en scola quasi betg pussaivel. RTR, Gionduri Maissen
La scola è stada serrada. Sco il maina-scola da Mustér Roger Tuor ha ditg na saja betg sulet il privel da lavinas l’argument principal. Era il viadi a scola durant ch’ì saja anc stgir saja privlus. Surtut las equipas da rumir naiv, sajan per part dapi uras sin pista ed gist ils scolarets stoppian perquai vegnir protegids a moda speziala, accentuescha Roger Tuor.
L’onn passà era la scola stada averta
L’onn passà eran las vias medemamain stadas serradas. La situaziun era sumeglianta, ma la scola era stada averta. Las scolaras ed ils scolars ch’abitavan en ils quartiers betg cuntanschibels eran stads a chasa, la gronda part dals scolars aveva dentant stuì ir a scola. Quest onn saja la situaziun stada autra. Cun quai che autras vischnancas vischinas hajan medemamain dà liber als scolars saja quest onn vegnì fatg insatge nov, accentuescha Roger Tuor.
Damaun puspè scola
Sco Roger Tuor ha ditg vegnan els a examinar la situaziun e lura decider sch'ei vegn fatg scola damaun. Ma cun quai che las prognosas mussian aura pli favuraivla saja fitg probabel normal scola damaun, segir a partir da damaun da mezdi.
RR actualitad 17:00