Sco quai ch'il president da la scola da skis Sursaissa, Marco Casanova ha ditg, saja el da l'avis ch'il luf n'haja pers nagut da quest temp en u damanaivel da territori abità. Quai na saja betg pli in sa cuntegnair normal. Il «Kinderland» saja per uffants e per ils giasts. Er en vista al fatg che quai na sajan betg ils emprims inscunters en quella furma pretenda Casanova finalmain mesiras dal chantun, en tge furma er adina.
Vis gist trais lufs sin sia spassegiada
Fabien Walder da Flond ha vis quasi il medem temp gist trais lufs sin sia spassegiada cun ses chauns. Er per il pur da chavals e suprastant da la vischnanca da Sursaissa n'è il sa cuntegnair dal luf betg pli acceptabel.
El menziuna er anc il cas d'avant set dis a Flond nua che quatter lufs hajan stgarpà e mangià in chavriel en il vitg tranter las chasas.
Plinavant senta el sco pur da chavals directamain las consequenzas da la preschientscha dal luf. Ils chavals sajan numnadamain bler pli spuritgs e temelitgs sch'il luf saja da manaivel. Per evitar accidents cun sia clientella u er cun uffants che vegnian a chaval tar el, ha el reducì las rundas giuador cun ils chavals
Mesiras gia la notg da gievgia sin venderdi
Er l'inspectur da chatscha, Adrian Arquint, vesa ch'igl è necessari da prender mesiras. I saja impurtant da tegnair davent ils lufs dals vitgs ed er dals carstgauns. Perquai sajan gia la notg da gievgia sin venderdi guardiaselvaschinas al lieu. Sch'ils lufs avessan anc ina giada da s'avischinar al territori abità empruvassan quels da stgatschar els. El vegnia a s'inscuntrar venderdi cun il president communal da Sursaissa per discutar ulteriuras mesiras, uschia l'inspectur da chatscha vinavant.
Adrian Arquint chapescha che cunzunt ils geniturs fetschian quitads per ils uffants sch'ils lufs s'avischinian als vitgs. El fa però er attent ch'i dettia qua in conflict da giavischs: D'ina vart saja il luf giavischà per enritgir nossa biodiversitad e da l'autra vart veglian ins la segirtad cumplaina. Quella na possian ins però betg garantir tar in animal selvadi.
Per l'inspectur da chatscha è però cler ch'i n'è betg bun sch'ils lufs s'avischinian als vitgs u s'endisian schizunt vi dal carstgaun. Quai veglian els en mintga cas empruvar d'evitar.
RTR actualitad 17:00