Il territori da skis da Sursaissa-Mundaun ha pliras ustarias, la pli veglia ed originala è dentant quella da Leo Casanova. Dapi 40 onns vegn el a barsar liongias e surtut a reparter als uffants dultschims. E sco l’um ch’ha uss 65 onns di, sajan ils uffants adina stads ils pli impurtants per el e blers vegnan anc adina a far ina visita tar el. E tgi che vegn a prender in refrestg u mangiar, lez dastga quintar cun ina sgnocca u ina remartga. Sias collavuraturas din che tut tgi che tschertga il spezial ed unic è en il dretg lieu tar Leo. Ma sco Michela Projer di, è il schef adina fitg preoccupà per las collavuraturas e mira che tut saja en urden e quai stiman tuts. Perquai vegnian er ils blers adina puspè a lavurar per la stagiun d’enviern en la «Leo’s Snackbar».
-
Bild 1 von 6. Bleras persunas èn vegnidas la sonda e dumengia passada per festivar il giubileum da 40 onns. Bildquelle: RTR.
-
Bild 2 von 6. L'ustaria da Leo Casanova en il territori da skis da Sursaissa-Mundaun. Bildquelle: RTR.
-
Bild 3 von 6. Alice Casanova, Leo Casanova e Michela Projer. Bildquelle: RTR.
-
Bild 4 von 6. En cuschina è Leo Casanova en ses element, dasper el Rosina Derungs. Bildquelle: RTR.
-
Bild 5 von 6. L'ustaria da Leo Casanova en il territori da skis da Sursaissa-Mundaun. Bildquelle: RTR.
-
Bild 6 von 6. Surtut ils uffants vegnan gugent tar Leo Casanova per dultschims. Bildquelle: RTR.
Cumenzà ha tut cun ina rulotta ed in grill
Ils cumenzaments avant 40 onns èn stads simpels. Leo Casanova ch’ha gist fundà ina interpresa da tetger, tschertga ina occupaziun per l’enviern e va spontan cun ina rulotta a vender liongias da brasar e servelas. E gia lura deva quai ils dultschims per ils uffants. E suenter plirs onns si e giu è la finala stà pussaivel da construir ina chasa en il lieu e da s’ettablir sco purschida en il territori da skis da Sursaissa-Mundaun. Ma senza ils osps fidaivels che vegnan surtut da la Lumnezia ma era d’auters vitgs en la vischinanza na fiss quai betg stà pussibel. Ed uss sajan tuts loschs sin el u scuidus e quai saja bun. Sur da conflicts u dispitas na possia el betg discutar, u hajan ins gugent el u betg, accentuescha Leo Casanova cun in rir.
Cuntinuaziun intscherta
Il mument cuntinueschia el cun ses manaschi, era sch’el saja uss gia 65 onns. Uschè ditg ch’il persunal vegnia ed el haja plaschair e possia, vegnia el a far vinavant cun il manaschi. Ma cler saja che sia figlia Jennifer Casanova na vegnia betg a surpigliar l’ustaria, ella sa gida cun la contabilitad e quai saja fitg impurtant, di Leo Casanova. Ma fin ch’el chatta avunda persunal vegnia el a cuntinuar e suenter guardar co e tgi che cuntinueschia.