La vischnanca da Sumvitg è cun Medel ensemen la suletta vischnanca en la Cadi senza ina pendiculara u in runal. Quai na saja da principi betg sulet in dischavantatg perquai ch’ins saja lura pli flexibel. Ma i na dettia betg ina tariffa d’indigens per las abitantas ed ils abitants da Sumvitg, accentuescha il president communal Patrick Schaniel. Perquai hajan els ponderà da sustegnair famiglias che fan sport, surtut cun la ponderaziun che promover activitads sportivas, augmenta alura era la sanadad da la populaziun.
In sustegn en bar da tranter 200 e 400 francs
Il sistem è simpel: Quels ch’han in'expensa en connex cun ina purschida sportiva, lez pon vegnir sin spurtegl cun la quittanza e suenter survegnan els la summa pajada ora direct en bar. Quai fetschian els nuncumplitgà e senza pli gronda birocrazia, di Patrick Schaniel. Contribuziuns survegnan uffants e giuvenils fin 20 onns che han ina commembranza annuala en ina uniun u in club da sport en Surselva.
Nus renconuschain en tut passa 80 sports tenor ils criteris da J+S.
Era hajan els per exempel integrà il fitness, uschia possian giuvenils survegnir ina contribuziun per lur abunament annual en la Surselva. Era sustegn datti per abunaments da skis annuals il mument fin a 300 francs. Nus n’avain betg francà ina summa fixa, mabain ina summa da tranter 200 e 400 francs per restar flexibels. Il mument saja budgetà 30’000 francs, pia per ils radund 100 uffants in sustegn da 300 francs.
Introducziun sin l’entschatta 2024
Sche la lescha vegn approvada a la radunanza communala dals 30 da schaner alura vegn quella introducida retrospectivamain sin l’entschatta dal 2024. Insanua stoppian ins trair in stritg era sche quai na bastia uschia betg per tut las famiglias che han cumprà sin quella stagiun in abunament da skis, ma la proxima stagiun possian alura las famiglias ed ils giuvenils a Sumvitg profitar d’in sustegn communal.