La proxima fin d’emna, ils 10 d’avrigl, elegia la populaziun da Sumvitg ses proxim president da vischnanca. Dus candidats vulan daventar successur dal president actual Armin Candinas.
Marc Cathomas
Marc Cathomas n’è enfin ussa betg s’engaschà activ en uffizis politics. El è vegnì proponì d'ina gruppaziun da persunas e betg sco usità en la vischnanca da Sumvitg d'in vischinadi. El vesa sasez sco alternativa envers ses cuntracandidat.
Ch’jau hai nagina experientscha politica po era esser ina gronda schanza. Quai po esser in avantatg.
Marc Cathomas viva en la Val Sumvitg e maina là in'ustaria. Dasperas va el cun il bus da scola e cun auto da posta.
Patrick Schaniel
Patrick Schaniel ha lavurà avant intgins onns sco chanzlist communal da Sumvitg. Il mument è el emploià tar l'uffizi da construcziun bassa, là è el responsabel per l'acquist da terren.
Jau enconusch ils process administrativs ed ils process politics ed jau hai ina vasta rait sociala.
Patrick Schaniel abitescha a Sumvitg ed è vegnì proponì dal vischinadi.
Betg il fain sin il medem ladritsch
RTR avess gugent fatg in discurs cun omadus candidats vid la medema maisa. Patrick Schaniel n’ha betg vulì s’inscuntrar directamain cun ses cuntracandidat.
