Da chattar emprendistas ed emprendists è quasi tuttina greva da Mustér fin a Cuira. La culpa sajan surtut annadas pli pitschnas, declera il responsabel per ils emprendists da l’interpresa Distec, Pierino Bisquolm. Daltut na possia el dentant era betg declerar la situaziun. La stad passada han dus emprendists cumenzà e quest onn ha la firma alura gist sis. Per l'avegnir saja el cuntent da mintgina e mintgin che veglia emprender da polymecanist, di Bisquolm.
-
Bild 1 von 5. La partiziun dals emprendists en la Distec a Mustér. Bildquelle: RTR, Gionduri Maissen .
-
Bild 2 von 5. Ils quatter interessads taidlas las explicaziuns da Pierino Bisquolm. Bildquelle: RTR, Gionduri Maissen .
-
Bild 3 von 5. L'entrada da la partiziun dals emprendists. Bildquelle: RTR, Gionduri Maissen .
-
Bild 4 von 5. Ils interessads emprendan d'enconuscher las maschinas. Bildquelle: RTR, Gionduri Maissen .
-
Bild 5 von 5. Il responsabel per ils emprendists en la Distec Pierino Bisquolm declera in toc construì a Mustér. Bildquelle: RTR, Gionduri Maissen .
La pussaivladad da far sbagls
L'interpresa Distec ha l'avantag d'avarir ina partiziun sulet per ils emprendists. Qua possian els emprender tut, era gist cun las maschinas, declera Pierino Bisquolm. Emprendistas ed emprendists lavuran cun las medemas maschinas - dentant senza squitsch da producir, mabain mintgin possia emprender cun ses tempo. Quai saja in grond avantatg, ma els stoppian cun quai era cumpensar in zic il dischavantatg da la periferia.
La finamira è da scolar ils futurs lavurers
La Distec vul scolar uschè blers emprendists sco pussaivel. Il dumber ideal fiss tschintg persunas ad onn, pia en total avess la partiziun 20 emprendistas ed emprendists. Quai saja dentant probabel in siemi, conceda Pierino Bisquolm. Tgi che emprenda la professiun, resta dentant era, uschia Bisquolm vinavant. Per l’ina perquai che las pussaivladads da sa scolar èn grondas, per l’autra perquai che lavurers èn il mument fitg tschertgads.
La situaziun è perquai sco en autras firmas era: Avunda lavur, avunda maschinas, dentant memia paucs lavurers. Perquai è mintga emprendista ed emprendist impurtant per l’avegnir da l’interpresa.