RTR: Silvan Caduff, il temp da fanar ha cumenzà. Ils blers van gia cun ina chargia suenter l'autra en stalla. Co è la situaziun quest onn, datti ora bain?
Silvan Caduff: Igl è anc grev da dir sch'igl è meglier che l'onn passà. Tscherts tocs han patì extremamain da la sitgira da l'onn passà. Là vesan ins che la racolta n'è betg uschè buna sco l'onn passà. Auters tocs han purtà almain tuttina bler fritg ni dapli.
Ins sto dir che l'onn passà avain nus gì in bun tagl da fain, quai che ha mancà èn stads il rasdiv e tersiel. Quels èn stads pauc u nagut pervi da la sitgira. Sche quels vegnan quest onn buns u betg è il mument anc memia baud da giuditgar. Quai che nus avain anc gì l'onn passà è stà in fitg bun atun. Igl è stà sitg che la biestga ha almain pudì star giuador e ch'ins n'ha betg stuì pavlar gist cura ch'ella è turnada d'alp.
Per il mument pon ins guardar positivamain en l'avegnir da la stad. Uschia ch'ins vesa ch'i pudess vegnir ora bain.
Vus avais gia cumpareglià in pau cun l'onn passà, la stad da sitgira. Quai vul dir ch'ins senta uss propi er anc las consequenzas. Ins na po pia betg dir che la stad passada è emblidada per il prà, malgrà ch'i ha uss fatg bun'aura.
Na, il terren n'ha betg pudì sa revegnir dal tut. I ha tscherts tocs che han patì in pau. Quai èn quels ch'èn exponids extremamain al sulegl. E lura n'avain nus er betg gì ina primavaira optimala – plitost fraid cun inqual schelada.
Quai ha natiralmain era in'influenza sin la vegetaziun, uschia ch'il fain fin n'ha betg pudì crescher. Igl è creschì plitost mo il fain grop. Il fain grop po bain era dar quantum, ma quai n'è betg la qualitad che nus vulain.
La primavaira n'è pia betg stada optimala. Vul quai dir ch'er sch'igl è uss stà bletsch la fin matg, entschatta zercladur che quai n'ha gnanc gidà als prads cunquai ch'igl è stà avant uschè fraid?
Bain, però quai ha gidà cunzunt ils prads, ch'èn in pau pli ad aut. Là vesan ins ch'i ha pudì crescher fitg. Il terren enturn vischnanca (Morissen è sin bun 1'300 m.s.m.) era però gia pli u main madir per racoltar e là è la plievgia vegnida in zic tard. Ed il fraid ha tegnì enavos tut in pau.
Sche nus turnain anc ina giada tar la stad da sitgira da l'onn passà – co avais Vus gì persunalmain cun il pavel, hai tanschì u avais era stuì cumprar tiers sco blers auters purs?
Jau hai gì il cletg ch'jau avev anc reservas dals ultims onns, uschia che jau sun mitschà cun in egl blau. Jau n'hai betg stuì cumprar vitiers bler.
Per questa stad essas però optimistic ch'i tanscha?
Gea, uss pon ins anc esser fitg optimistics ch'i pudess dar ina buna stad.
Tge fiss il scenari ideal er da l'aura anora per ch'ils tagls da rasdiv e tersiel gartegian questa giada?
Also, per nus qua en nossa regiun fiss optimal almain ina giada ad emna in di da plievgia. Lura po quai be vegnir bun.
RR actualitad 08:00