L'idilla è gronda a Signina, nagins autos, sulet maschinas agriculas èn vegnidas sguladas cun helicopter en il vitg cun ragischs gualsras. Il mument abiteschan sur onn anc duas persunas qua: Peter Derungs e sia dunna Hedy.
Els sajan fitg gugent a Signina, di l’um pensiunà. Avant onns ha el, ch’ha ragischs a Pitasch, pudì cumprar ina chasa qua - surtut pervi da la chatscha. Avant quasi 20 onns sajan els lura vegnids per adina a Signina ad abitar, ma la dunna haja proponì quai, el n’avessi betg giu il curaschi da far questa proposta, di Peter Derungs cun in surrir, ma els na sajan mai s’enriclads da quest pass.
12 onns mintgadi ì a lavurar cun la pendiculara
Il temp avant la pensiun è Peter Derungs ì mintgadi a lavurar cun la pendiculara. Quai dovria ses temp, ma memia tard na saja el mai stà. L’enviern saja dentant savens stà da far ora la naiv, l’emprim fin a la pendiculara ch’è circa tschintg minutas a pe davent da la chasa e alura era fullar la via cun l’auto fin a Riein. Ma la pendiculara lezza haja adina funcziunà senza incaps. Sulet d’urizis saja ella gia stada airi a mez, ma la fin finala saja ella adina puspè vegnida sin tschella vart, di Peter Derungs, che manischescha e fa regularmain las controllas necessarias.
Ina giada ad onn vegnan experts a far controllas, e forsa vegn tut anc pli digital. Il mument è la tecnica moderna, ma anc betg digitala. Mintga proprietari ha ina clav per la cabina e po uschia traversar co el vul. Ils visitaders han la pussaivladad da telefonar e clamar la cabina - er quai fa Peter Derungs. El è quasi responsabel per tut, conceda el.
Pendiculara pitschna po purtar 800 kilos
La pendiculara che maina sur la val ha plaz per quatter persunas e po purtar ina paisa da total 800 kilos, quai quintà cun las persunas. Pli baud vegniva anc transportà biestga cun la cabina ma quai temp è passà. Uss èsi anc da far mintgatant transports da rauba, ma la gronda part vegn sgulà cun helicopter.
Per els, ed ils possessurs da las autras chasas, è la pendiculara impurtanta sco colliaziun, e la stad circulescha quella era pliras giadas. L’enviern vegni alura pli quiet a Signina, lura vegn la pendiculara duvrada quasi sulet per ils Derungs. Cura ch’els na vivian betg pli sur onn a Signina alura stoppia la vischnanca mirar auter co far, ma uschè ditg ch’els possian, restian els a Signina, di Peter Derungs cun in surrir.
Or da l'archiv:
