La scola claustrala da Mustér trametta la 5avla e 6avla classa a partir dad immediat en home-schooling. La raschun è che plirs scolars e scolaras èn vegnids testads positiv sin il coronavirus. Quai ha confermà il manader da la scola claustrala, Tom Etter, sin dumonda da RTR.
Ils cas d'infecziun en las classas sajan vegnids enconuschents grazia als tests da pool als quals las scola sa participescha dapi la fin da favrer. Ins haja uschia pudì reagir a moda sperta, manegia il directur. Ils tests da corona en scola cuntinueschan uss sco previs cun las classas restantas.
Ils examens da matura cumenzan en 15 dis. Malgrà tut, duain quels avair lieu sco planisà.