Là nua che requirents d'asil abitavan durant passa dus decennis, discurran las abitantas ed ils abitants ussa la lingua d'economia. Dapi trais onns pon interpresas giuvnas abitar e lavurar per in pretsch favuraivel en il bajetg istoric. Uschia è era l'eveniment da venderdi stà ina plattafurma, nua ch'interpresas giuvnas han pudì sa preschentar per persvader eventuals investiders e nova clientella. Radund trenta persunas han gizzà las ureglias cura che las otg fatschentas han referì. La glieud interessada ha silsuenter pudì tschentar dumondas e dar in resun. Suenter las preschentaziuns han ils interprendiders ed investiders potenzials pudì sa barattar tar in apero.
Eveniment per interpresas giuvnas a Schluein
-
Bild 1 von 5. Interprendidras ed interprendidras dals start-ups. Bildquelle: RTR.
-
Bild 2 von 5. Interprendidras ed interprendidras dals start-ups cun tut la glieud ch'è stada preschenta durant l'eveniment. Bildquelle: RTR.
-
Bild 3 von 5. Mintga start-up ha pudì sa preschentar durant in quart d'ura davant las «lieurs veglias» da l'economia. Bildquelle: RTR.
-
Bild 4 von 5. Ils sulers dal grond bajetg: Ussa in lieu per interpresas, artistas ed artists ed in spazi per sesidas e da collavurar. Bildquelle: RTR.
-
Bild 5 von 5. Bajetg istoric: Il «nov» chastè da Löwenberg a Schluein. La ruina dal chastè medieval è in pèr meter en il vest da quest bajetg. Bildquelle: RTR.
In'uniun d'interprendiders versads
L'uniun Surselva Impact Lab existia per gronda part da glieud da fatschenta che sajan insaco colliada cun la regiun, savens sajan quai segund-dimorants pensiunads ch'han ina gronda rait en il mund economic. Quella glieud veglia investir en fatschentas giuvnas cun potenzial, uschia il suprastant e responsabel dal ressort start-ups da l'uniun, Willy Bischofberger.
Nus essan sez anc in zic in start-up.
Suenter trais onns haja dà bler midadas tar las interpresas. I dettia da quellas che sajan idas vinavant, cunquai ch'ellas sajan sa sviluppadas. In svilup da cuntin saja era la renovaziun dal chastè da Löwenberg. Ils daners che l'uniun survegnia, dovria ella per quest intent.