Riccardo Wolf è daventà avant in onn e mez bab, tge ch'è per el la raschun principala da chalar sco ustier. Lavurar 60 enfin 80 uras ad emna ed avair ina famiglia na giaja betg. Uschia è el vi dad organisar la fin da la gestiun en las proximas emnas. Entschatta october vegn ina davosa giada festivà ina «Irish Night» cun musica, spaisas e biera irlandaisa. E lura èsi a fin.
L'ustier ha uschè bler da far ch'el n'haja anc betg gì temp da reflectar sur da la fin. El è surtut cuntent d'avair en il futur dapli temp per la famiglia. El haja gì grond plaschair da lavurar sco cuschinier independent, mo i dat pliras chaussas che na giajan betg, tranter auter la mancanza da persunal e las uras ch'in schef haja dad esser preschent en fatschenta.
Er sche Riccardo Wolf chala sco cuschinier ed ustier vegn el a restar fidaivel a ses mastergn. Sco instructur tar Gastro Grischun dat el vinavant sia savida a la proxima generaziun da cuschiniers. La successiun da l'ustria «Posta Veglia» è sclerida.
