Perquai che la via existenta vers Laax sa chatta en ina zona da protecziun da l'aua da funtauna, n'èsi betg pussibel da simplamain sanar quella. Dapi onns è l'uffizi da construcziun bassa pia vi d'evaluar variantas per in nov trassé. Fin oz hai dà 25 variantas per quest tschancun. La varianta ch'il chantun aveva favorisà, fiss ida sur il vitg ora tar in lieu cun il num «Plaun Pigniel». Quai è in lieu popular cun plazza da gieu e fuaina. Ma cunter quella varianta avevi dà avant trais onns ina petiziun cun 1'406 suttascripziuns da la glieud da Sagogn –inclusiv d'ina proposta per in'autra varianta.
Nus avain cun quai vulì metter cler che la populaziun vul, tge che la votaziun unanima demussa.
Tar la davosa radunanza communala da Sagogn mez zercladur ha la suprastanza suttamess quatter variantas al suveran per ina votaziun consultativa. La radunanza communala ha votà unanimamain per il trassé che va sut la zona da protecziun d'aua da funtauna per alura puspè far ina storta ensi en la sortida existenta da la via chantunala.
Tenor Thomas Candrian – ch'è stà president communal fin zercladur – haja la vischnanca era tschertgà il dialog cun il comité da «via Precauta». Lez aveva lantschà la petiziun avant quatter onns. Ils iniziants avevan proponì ina varianta tenor il trassé existent, dentant cun guntgir la zona da protecziun surora.
L'evaluaziun da las variantas dura tenor l'uffizi da construcziun bassa enfin la fin da quest onn. Silsuenter haja la regenza da decider en chaussa. Sche la varianta favorisada da la vischnanca da Sagogn è alura la varianta finala, vegn a sa mussar. Enfin che l'entira procedura saja a fin ed ins possia cumenzar a bajegiar, dovra tenor l'anteriur president communal da Sagogn anc minimum tschintg onns.
