Dapi onns tschertga l'Uffizi da construcziun bassa in nov trassé per colliar il vitg da Sagogn cun Laax. Ussa ston tut las variantas anc ina giada vegnir evaluadas.
Resistenza envers project dal chantun
Avant dus onns era l’uniun «Via Precauta» sa dustada envers il nov trassé planisà per la via da colliaziun tranter Sagogn e Laax. Ussa ha il chantun definì co i duai ir vinavant. Sco il manader da l'Uffizi da construcziun bassa, Reto Knuchel, ha ditg sin dumonda dad RTR, è planisà en in emprim pass ch'in biro extern taxescha anc ina giada tut las 19 variantas ch'èn vegnidas evaluadas insacura ina giada. Involvidas en il process vegnan era la vischnanca da Sagogn, l'uniun «Via Precauta» ed ils uffizis chantunals ch'han da giuditgar il project. Sco Reto Knuchel ha ditg cuzzia quai process enturn dus onns. Enfin che la via saja la finala construida vegni tenor el anc a cuzzar in pèr onns.
