Atgnadad da ROCKseDRUN
Els hajan mantegnì il concept cun musica rumantscha, perquai che quai saja ina atgnadad da ROCKseDRUN, di Curdin Brugger, president dal comité d’organisaziun. La finala dettia quai era blers musicists da Tujetsch e cun dar paisa a la musica rumantscha possian els sa differenziar d'auters open airs.
- Sonda saira sunan las Liricas Analas, Tartaruga e Curdin Nicolay.
- Venderdi saira sunan Milwalkie (in Tuatschin suna en la gruppa), Supersiech e From Kid.
Els hajan elegì questas gruppas tenor las relaziuns ch’els hajan, saja quai ch'insatgi enconuschia ina gruppa ubain ch'insatgi haja fatg attent ad ina gruppa.
Entrada gratuita
L’entrada als concerts è gratuita. Be grazia als sponsurs saja quai pussaivel d’organisar quest eveniment, di Pascal Berther, commembra dal comité d’organisaziun. I saja fitg impurtant d'avair l’agid dals sponsurs era en avegnir. Nov a ROCKseDRUN è ina animaziun per uffants (da las 18.00 – 20.30). Previs èsi ch’il clown Wendolina divertescha ils uffants.
En media 1000 persunas
L’eveniment cun ils concerts da venderdi e sonda saira saja stà in success fin uss cun en media 1000 persunas pro eveniment, di Pascal Berther. Els sajan fitg motivads, e perquai duessi era dar il 2018 puspè tals concerts a Sedrun.
RR actualitad 11:00