Ils lufs procuran per problems. Quai è era en Frantscha ed en Germania uschia
Co fan ils auters?
Sut il titel: «Luf e protecziun da muntaneras – ils cunfins» ha l’uniun purila dal Grischun organisà a Landquart ina dieta d’infurmaziun. Dasper il manader da l'Uffizi da chatscha e pestga e Peter Küchler, il directur dal Plantahof, han era Laurent Garde, doctor d'ecologia ed antropologia ord la Frantscha e Gregor Bayer, manader dal «Forum Natur» da la Germania rapportà co che lur pajais federativs sa cuntegnan envers il luf.
Frantscha
En la Frantscha datti il mument enturn 600 lufs che tutgan tar la populaziun da las Abruzzas. Quels han stgarpà l'onn passà passa 12’000 animals da niz, da quai bunamain 9’000 nursas e tranter auter era 60 chauns da protecziun. Per dar dumogn a la situaziun è vegnì introducì avant trais onns il «culp da defensiun». Lufs che attatgan muntaneras dastgan vegnir sajettads e quai enfin 19 pertschient da la populaziun. Per l'onn 2021 fissan quai 110 lufs. Cura che quella quota è cuntanschida èsi finì cun sajettar lufs.
Germania
Ils lufs da la Germania tutgan tar la populaziun Baltica. Cun enturn 2'000 lufs han ils Tudestgs trais giadas dapli lufs che la Frantscha. Tuttina èn enfin uss sulet quatter lufs vegnids sajettads legalmain quest onn. Sco en Svizra posseda il luf ina protecziun quasi absoluta. A Brandenburg vulan ins ussa introducir ina cifra maximala per il dumber da lufs. Tut ils lufs che surpassan quest dumber duain vegnir sajettads. Pes savair far quai dovri ina midada da lescha da l’Uniun Europeica uschia che quai savess anc cuzzar in mument enfin ch’ils lufs tudestgs vegnan en il visier dals chatschaders.
