Falera ha in nov president. Cun 85 da 132 vuschs ha la radunanza communala elegì l'um da 61 onns che n'è fin ussa betg stà activ en la politica e ch'ha dapi tschintg onns ses lieu da domicil a Falera. Norbert Good sco era ses cuntracandidat, Alexander Jörger, han gì posts da manar en l'economia privata. Tuts dus n'èn betg en ina partida e tuts dus èn s'annunziads sco candidats suenter ch'ina cumissiun da recrutaziun aveva tschertgà activamain candidats potenzials l'onn passà.
Norbert Good ha visiblamain gì grond plaschair da sia elecziun. El saja fitg losch ed i saja grondius, ha el ditg. Dumandà davart ses emprims acts uffizials e tar ses stil da manar, ha el ditg, ch'el veglia sco emprim tadlar per savair per tge ch'i giaja. El ha sco prioritads e finamiras da meglierar la situaziun d'abitar e purtar dapli vita en il vitg la stad cur che Falera ha rodund 11'000 letgs fraids. Sco turisticher saja el cleramain era per il svilup dal resort «La Mutta». Impurtant saja in svilup sanadaivel dal turissem e dal vitg. L'emprim di en l'uffizi ha Norbert Good l'emprim da fanadur.
Areguard il rumantsch vul el tant pli spert emprender la basa da la lingua. Ch'el vegnia a manar ina radunanza per rumantsch na vegnia betg ad esser pussaivel, ma chapir e forsa ina giada manar ina simpla intervista duess en il futur esser la finamira, di el.
Dapli che 2,8 milliuns francs atgna finanziaziun
La radunanza communala da Falera ha plinavant approvà venderdi saira il quint annual dal 2022. Quel serra cun in surpli d'entradas da passa 2'395'000. L'atgna finanziaziun è tar dapli che 2,8 milliuns francs. Ina da las raschuns per quest bun resultat èn tranter auter las autas entradas da taglias sin il gudogn da venditas da giaschom ed entradas da taglia sin las midadas da maun. Il quint d'investiziun serra cun investiziuns netto da var 348'000 francs.
Ulteriuras tractandas
- La radunanza communala ha sper quai approvà unanimamain la revisiun da la lescha da salarisaziun da la vischnanca da Falera. Quella revisiun è necessaria pervia da la revisiun da la constituziun da la davosa radunanza communala.
- Per l'auter ha ella er approvà unanimamain la lescha per dar terren en il dretg da bajegiar a glieud indigena. Duas parcellas fissan en il mument gia disponiblas, sur da la basa legala ha la radunanza communala gì da votar e la radunanza da la plaiv vegn a suandar cun la votaziun latiers.
- Il credit da var 193'000 francs per in tumbin existent da furnir aua a Clasgieri, ha la radunanza medemamain approvà unanimamain.
- En la cumissiun da gestiun ha la radunanza elegì duas novas commembras ed en la cumissun da bajegiar trais novs commembers.
