Alexandra Camenisch, oriunda d'ina famiglia purila da Schnaus/Castrisch, ha sviluppà gia baud in grond interess per il bain puril e l’agricultura. Ella ha fatg ses emprims tagls ensemen cun ses bab ed il taglia-pumera da Castrisch Jakob Caviezel. Questas emprimas experientschas han furmà la basa per sia savida actuala. Ella haja suenter ch’ella ha survegnì tips e trics sco far, sezza cumenzà a tagliar la pumera. Tar plantas giuvnas è ella anc precauta, cunquai ch’ins possia far bler fauss. Sch’ins taglia la pumera memia fitg, fetschia quella memia blera roma da feglia e betg roma che porta fretgs l’onn che suonda. La roma na duess betg crescher encunter ensi ed encunter il bist, perquai ch’ella fa alura memia blera sumbriva, tge che fetschia ch’ils fretgs na vegnian betg madirs u gronds.
Ins sto guardar da tegnair la roma encunter anora ch’il rom po purtar fritgs. Ma igl è era da guardar ch’el na survegn memia blers fretgs.
Pli grad ch’il rom saja, pli bler fritgs ch’el fa. E pli ensi ch’el guardia, pli paucs fritgs ch’el dettia. Quai surtut tar maila. Il pli gugent taglia Alexandra Camenisch tschareschers. Quels na stoppian ins betg tagliar uschè fitg. Auter è quai tar pairers, quels sajan spess.
Las Reineclaudes (era numnadas primblas noblas) èn ina sutspezia dal primbler. Ellas èn enconuschentas per lur furma radunda e lur colur che variescha tranter mellen-verd e dorà. La charn da quest fritg è spezialmain dultsch e sucusa. Il num deriva da la regina Claudia da la Frantscha (1499-1524), che stimava fitg quests fritgs.
Ina dumonda da furma
Sch’ins dat in sguard sin la pumera ch’Alexandra Camenisch ha taglià, ves’ins ch’ella ha fatg quai cun premura e cun furma. La furma da la puma n’è betg casuala. Ella correspunda a la furma dals fritgs ch’ella porta. Ins po dir ch’igl è en il ver senn dal pled ina chaussa da furma.
Ins taglia il pumer sco la furma dal fritg. Tar maila taglian ins il pumer radund. Uschia per exempel er tar Reineclaudas.
Impurtant èsi era da proteger las plantas encunter malsognas, quai senza springir chemicalias. Perquai ha Alexandra Camenisch fixà ina corda vid il bist da la planta. Sin quella hai ina cola speziala che tegn davent furmiclas. Quellas «train» savens plugls da feglia e plugls squamads (Schildläuse). Ella haja fatg bunas experientschas cun quella metoda.
Normalmain dettia mintga dus onns ina buna raccolta. I saja alura era fitg bel da vesair l’atun ch’i ha dà bellezza maila e paira ed insumma che la pumera ha bella feglia e saja sauna, uschia Alexandra Camenisch. Ed i saja era bel d’alura pudair seser en la sumbriva dals pumers.