Producziun da skis a Mustér - Simon Jacomet banduna Anavon Ski la fin fanadur
Sco mainafatschenta e responsabel per il svilup dals skis haja Simon Jacomet gì in'autra filosofia co manar l'interpresa ed era co sviluppar la marca ch'ils ulteriurs commembers da la gestiun. Uschia sajan ins sa cunvegnids da sa separar, scriva l'interpresa en ina communicaziun a las medias.
Legenda:
Avant la Anavon ski SA aveva Simon Jacomet fundà la Zai ski SA – quella ha bandunà Mustér per la Bregaglia.
ANR, Susi Rothmund
Tenor il nov mainafatschenta, Andreas Egli ch'è gia commember dal cussegl d'administraziun, saja il lieu da producziun Mustér sco era il dumber actual da collavuraturs vinavant garantì. Il svilup dals skis per la stagiun vegninta saja gia terminà e quel per la stagiun 2020/21 surpiglian lura novs collavuraturs.
Legenda:
Andreas Egli, il nov mainafatschenta da Anavon Ski SA.
RTR, Gonduri Maissen
Be 16 mais tar Anavon Ski SA
Avant ses engaschi tar la Anavon Ski SA ha Simon Jacomet manà durant plirs onns sia atgna interpresa da skis en il medem lieu, la Zai SA.
Suenter che quella ha midà il lieu da producziun da Mustér en la Bregaglia è Simon Jacomet lura s'engaschà sco mainafatschenta e sviluppader tar la Anavon Ski SA. La producziun ha cumenzà l'avrigl 2018.