I saja sta ina greva stagiun, ha il president dal l’associaziun, Markus Good (Pendicularas Sursaissa), confermà en ses rapport annual. La bilantscha registrescha ina reducziun da osps da 8,4 % e da 14,4 % tar la svieuta da transports. Il grond dumber dals utilisaders dal pass da skis Surselva, numnadamain 34 %, han duvrà quel per ir cun skis a Sursaissa. I suonda cun 20% il territori dil Mundaun, alura 17% quel da Breil Vuorz Andiast. A Laax e Sedrun Andermatt èn mintgamai 11 % stai.
Naiv artifiziala indispensabla
Markus Good ha analisà las frequenzas generalas ed il decurs dal la staziun 2022/23. Ella cumparegliaziun dals diesch onns passads è la bilantscha generala acceptabla. Las emprimas entradas en stadas 3,1 % damain e la svieuta da transports 13%. Senza indriz da naiv na fissi la situaziun betg stada da dumagnar e las consequenzas fatalas. «Malgrà ch’ils custs da manaschi creschan essan nus sfurzai d’engrondir noss implants d’ennavar», ha Markus Good detg. Per l’entira industria turistica sajan talas investiziuns d’impurtanza eminenta, il sport da skis saja ina part essenziala dal l’economia grischuna.
Adina novas sfidas
Ulteriurs quitads che fatschentan pli e pli las pendicularas da la Surselva è la mancanza da persunal qualifitgà e malsegirtads pertutgant la stgarsezza da current electric. «Adina novas sfidas na vegnan betg a mancar egl avegnir», ha il president manegià. «Cun nossas experientschas dal passà, e grazia al bun spiert da cuminanza che regia en nossa branscha, sun jau da buna speranza che nus dumognian quellas», ha el agiuntà.
Runal La Péra
Ina decisiun a chaschun da la radunanza generala ha mess sin l’emprova quella solidaritad. Igl è in conclus che pertutga la pli pitschna da las societads commembras. En connex cul quint dal pool dal pass da skis Surselva ha Bruno Pfister, il president dal runal La Péra da Trun, dumandà la radunanza da discutar d’ina indemnisaziun al deficit a la societad. La stagiun passada è il manaschi a Trun/Campliun stads averts gnanc in sulet di. En l'istorgia da passa 50 onns è quai sta la segunda giada il cas. La radunanza generala dal 2010 aveva decis da conceder mintg’onn al runal La Péra ord il pool dil pass da skis ina pauschala annuala da 10’000 francs.
Decisiun da tagl dal president
Il runal La Péra ha giu la stagiun 22/23 nagins custs da manaschi, ha dentant era savì porscher nagut e far naginas prestaziuns, cunzunt per promover la giuventetgna per il sport da skis. Pervia da l’aura n’ è il runal renovà betg stads averts. Custs fixs na hai tuttina dà, uschia ch’il manaschi ha chaschuna in deficit. Sa basond sin la decisiun dal 2010 han ils da Trun tramess a l’associaziun Pendicularas Surselva il quint per la pauschala. La suprastanza ha dentant refusà quel e proponì il medem a la radunanza generala. Ina votaziun ha purtà in resultat nuncler: 3 Gea, 3 Na. Uschia ha il president Markus Good stuì dar la vusch da tagl. La decisiun è ida a favur da la solidaritad. Uschia retschaiva il runal La Péra ina indemnisaziun unica da 4000 francs or da la cassa dal pool dal pass da skis Surselva.
Pass da skis Surselva
Beat Zenklusen, il cassier dal l’associaziun e directur da las Pendicularas Breil Vuorz Andiast, ha preschentà a la radunanza generala las cifras dil pass da skis Surselva. La stagiun 2022/23 ha quel fatg ina svieuta da 867’000 francs, igl en 0,5 % damain ch’igl onn precedent. Tar il dumber da pass vendi ha el mussà la cifra da 679, quai è in minus da 4,2 %. Emprimas entradas el territori da skis cul pass da skis Surselva han ins dumbrà 21’548, quai en 21,4 % damain ch’igl onn precedent.
Da discutar ha il pass da skis sez da. Las pendicularas da Andermatt-Sedrun vulan in augment da pretsch per quel. Damai ch’igl n’ è betg sta pussaivel da far quai gia sin quest onn, datti ina limitaziun da dis ch’igl è pussaivel d’ir cul pass da skis el territori ad Andermatt-Sedrun. Quai aveva procurà il davos temp per intginas discussiuns e brevs da lecturs.