Las pendicularas da Breil/ Vuorz/Andiast dovran in nov directur. Beat Zenklusen dat giu ses post da directur tar las pendicularas e la Breil Resort SA sin la fin da settember, quai communitgeschan ils cussegls d'administraziuns da las duas organisaziuns.
Sco Hansueli Baier, il president dal cussegl d'administraziun da las pendicularas da Breil, ha ditg sin dumonda da RTR, haja il directur partent infurmà el la sonda da sia decisiun. Il motiv saja la sanadad. El na possia betg lavurar vinavant en questa cadenza – la battaria saja vida.
La lavur en il sectur da turissem saja fitg pretensiusa, e Beat Zenklusen haja manà las pendicularas sco er il ressort da vacanzas Pradas, duas interpresas cun ensemen 12 milliuns svieuta. Da la pandemia da corona sajan restads fastizs, la midada dal clima fetschia quitads ed i saja anc vegnì vitiers in project da bajegiar ora Pradas, en il volumen da 5 milliuns. Beat Zenklusen saja vegnì al cunfin da sias forzas cun tut questas sfidas.
Zenklusen, ch'ha timunà las pendicularas ils ultims 10 onns, veglia reducir il pensum da lavur ed en dus onns ir anticipadamain en pensiun. La tschertga da sia successura u da ses successur cumenzia las proximas emnas, hai num vinavant. Betg cler èsi sch'ina persuna vegnia puspè a surpigliar la direcziun d'omaduas interpresas, u sche duas persunas surpiglian mintgamai in timun.
