Tenor ina lescha federala avessan tut las vischnancas e citads en Svizra stuì realisar mesiras da protecziun cunter canera fin ils 31 da mars 2018. Uschia sa chattia la citad da Glion en ina zona grischa, ha declerà in represchentant da l'Uffizi da construcziun bassa.
Plinavant saja la situaziun da canera a Glion per part sur las normas. Pia duai in'introducziun dal tempo 30 meglierar la situaziun - E quai gist sin l’entir intschess da la citad – Quai per far pli simpel la signalisaziun, sco era la situaziun per las automobilistas ed automobilists, uschia l’argumentaziun da la suprastanza e dals uffizis.
Exposiziun publica
Che tut na saja betg adina stà optimal, surtut cun la communicaziun, conceda era la presidenta communala Carmelia Maissen. Perquai hajan ins uss preschentà al parlament il project. Plinavant datti in'exposiziun publica, nua che mintgina e mintgin po prender posiziun en chaussa. Lasuenter sto la regenza grischuna approvar il project ed en cas ideal pon las novas reglas ir en vigur anc quest onn.
Tenor la president communala, na sappian ins anc betg tge reacziuns ch'i dat sin las propostas. Impurtant saja d’esser transparent: La vischnanca na veglia betg realisar in agen project, mabain sulet applitgar la lescha federala, ha ditg Carmelia Maissen.
Duas dunnas sco autoritads communalas
Vinavant ha il parlament da la vischnanca da Glion elegì per ils proxims dus onns Gierina Gabriel sco presidenta dal cussegl e quai unanimamain. Vicepresidenta daventa Mathilda Derungs. Uschia è il post da la pli auta represchentanta da la vischnanca, sco era il vicepresidi en ils mauns da duas dunnas. Latiers vegn ch’era ina dunna presidiescha la vischnanca – Probabel in unicum en il chantun Grischun.
Decidì ha il parlament da Glion era sur da durs credits. In davart ina summa da 2,3 milliuns francs en connex cun la meglieraziun da Ruschein, l’auter davart ina summa da 2,8 milliuns francs per renovar ed optimar il provediment d’aua a Siat. Omaduas fatschentas vegnan anc avant il pievel. La decisiun sur d'in credit per ina plazza nova en l’administraziun ch'è responsabla per la communicaziun è vegnida spustada sin la proxima sesida dals 9 da mars.
