Sco la Pro Lucmagn ha pudì orientar sias commembras e ses commembers a la radunanza generala il mardi saira a Campra, èsi reussì da fixar in urari per la stad vegninta. Dals 14 da zercladur enfin ils 19 d’october 2025 circuleschan bus directs da Mustér a Biasca e da Biasca a Mustér. Las quatter colliaziuns èn repartidas sin l’entir di. Per il servetsch èn las interpresas dals autos da posta da las duas regiuns responsablas.
L’emprim bus parta a Mustér a las 08:03 ed è a las 09:51 a Biasca. La davosa chaschun dad ir da Biasca a Mustér exista a las 16:03 cun arrivada a las 17:51 a Mustér. La gronda part dals ulteriurs curs da las duas interpresas mintgamai enfin sin il pass restan.
En il senn da la Pro Lucmagn
Il president da la Pro Lucmagn, Martin Candinas, è satisfatg da la soluziun chattada: «Igl è in pitschen pass, ma in en la dretga direcziun. Questa purschida promova il traffic public sur il pass ed è da grond’impurtanza era sco simbol da la collavuraziun tranter las duas regiuns.»
La purschida haja la Pro Lucmagn persequità ditg, era sch’ella na saja da principi betg responsabla per il manaschi dal traffic dal pass durant la stad. La stad 2025 duain vegnir fatgas las emprimas experientschas cun questa purschida, vul dir cun l’urari fixà. Silsuenter saja da guardar vinavant. La finamira saja anc adina d'avair traffic public sur il Lucmagn er durant l’enviern. Las experientschas da las proximas stads vegnian lura a mussar tge pussaivladads ch’i dess era per la stagiun fraida.
L’enviern exista per il mument nagin servetsch dal traffic public sur il Lucmagn. Il servetsch nov per la stad 2025 vegn exequì da las duas societads d’auto da posta da Mustér e Biasca sin incarica dals chantuns Grischun e Tessin. Consequentamain è era la finanziaziun reglada.